ការសិក្សាស្រាវជ្រាវ អាចចាត់ទុកបានថាជាលក្ខខណ្ឌធានាអត្ថិភាព​និរន្តរភាពនិងកិច្ចអភិវឌ្ឍនៃចំណេះវិជ្ជា លើគ្រប់វិស័យទាំងអស់ ទាំងវិទ្យាសាស្ត្រជាក់លាក់ ទាំងវិទ្យាសាស្ត្រសង្គម ដែលមានជាអាទិ៍ ទស្សនវិទ្យា ប្រវត្តិវិទ្យា នីតិវិទ្យា ។ ល ។ និយាយម្យ៉ាងទៀតបានថា ការសិក្សាស្រាវជ្រាវ គឺជាលក្ខខណ្ឌចាំបាច់មិនអាចខ្វះបានមួយសម្រាប់ធានាចីរភាពនៃចំណេះគ្រប់ផ្នែករបស់មនុស្សជាតិ ( ក្នុងន័យនេះ ទស្សនាទាន ‍« ចីរភាព » មានរួមបញ្ចូលនូវដំណើរបីយ៉ាងជាមួយគ្នាគឺ: អត្ថិភាព=ភាវៈមាន , និរន្តរភាព=ភាវៈកើតជាតំណជាប់មិនដាច់ និង អភិវឌ្ឍនភាព=ភាវៈនៃការរីកចម្រើន ) ។

       នៅក្នុងបរិការណ៍កម្ពុជា ដែលប្រភពឯកសារទាំងឡាយស្តីពីវប្បធម៌ អរិយធម៌ និងបេតិកភណ្ឌប្រវត្តិសាស្ត្រខ្មែរ បានទទួលរងវិនាសកម្ម ជាបន្តបន្ទាប់ អស់ជាច្រើនសតវត្សកន្លងទៅ ដោយសារកត្តាសត្យានុម័ត ពោលគឺបាតុភូតធម្មជាតិដែលមនុស្សមិនអាចគ្រប់គ្រង់បានផង និងដោយសារកត្តាអត្តនោម័ត ដែលកើតឡើងដោយក្រុមជនអគតិមួយចំនួនផង ការសិក្សាស្រាវជ្រាវអំពីប្រវត្តិសាស្ត្រអាចចាត់ទុកថាជាការរើបម្រះចេញពីហាយនភាពកន្លងទៅផង និងជាការប្រោសឳ្យរស់ឡើងវិញនូវមនសិការ និងការចងចាំរបស់សង្គមជាតិ តាមរយៈការកត់ត្រា ការប្រមូលចងក្រង និងថែរក្សាទុកឳ្យគង់វង្សឡើងវិញ នូវព្រឹត្តិការណ៍ ចំណេះវិជ្ជាវិទ្យាសាស្ត្រ កេរដំណែលទាំងឡាយដែលធ្លាប់បានបាត់បង់ ឬធ្លាប់ត្រូវបានបំភ្លេចបំភ្លាំង ឬត្រូវបានកាយកប់សន្ធប់ទៅក្នុងអតីតកាលផង ។

      ចំពោះវិស័យវិទ្យាសាស្ត្រ ការសិក្សាស្រាវជ្រាវ អាចផ្តល់ « ពុទ្ធិវិភាគទាន » ដ៏មានតម្លៃដល់ការដ្ឋាននៃកំណែទម្រង់ប្រព័ន្ធអប់រំស៊ីជម្រៅ « ពង្រឹងមូលដ្ឋានគ្រឹះ និងកែលម្អបរិយាកាស វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីអភិវិឌ្ឍសង្គម-សេដ្ឋកិច្ចប្រកបដោយចីរភាព និងគុណភាពជីវិតប្រជាជនឳ្យកាន់តែប្រសើរ » វិទ្យាសាស្ត្រ បច្ចេកវិទ្យា និងនវានុវត្តន៍ ( Science,Technology and Innovation  ឬ STI ) ត្រូវបានទទួលស្គាល់ជាសកលថាជាកម្លាំងចលករសម្រាប់ការអភិវឌ្ឍសេដ្ឋកិច្ចប្រកបដោយចីរភាពធ្វើឳ្យកាន់តែប្រសើរឡើងនូវជីវភាពសង្គម និងផ្តល់ដំណោះស្រាយលើបញ្ហាបរិស្ថាន ដែលជាកត្តាមូលដ្ឋានគ្រឹះទាំងបីសម្រាប់ការរស់រានសុខសាន្តចីរភាពរបស់មនុស្សជាតិ ។

     សារៈសំខាន់នឹងភាពចំាបាច់នៃ វិទ្យាសាស្ត្រ បច្ចេកវិទ្យា និងនវានុវត្តន៍( វ.ប.ន )គឺអាស្រ័យដោយវាជាផ្នែកពុទ្ធិនិងមិនអាចខ្វះបាននៃគ្រប់ផលិតផល វិធីសាស្ត្រ និងសេវាកម្ម ដែលជាស្នាដៃរបស់មនុស្សជាតិ ។ ភាពមិ​នអាចខ្វះបាននេះ គឺតម្រូវឳ្យយើងមានលទ្ធភាពបង្កើតនិងមានលទ្ធភាពធ្វើឳ្យកាន់តែប្រសើរឡើងនូវផែ្នកនេះដើម្បីការអភិវឌ្ឍប្រកបដោយចីរភាព ។ ផ្នែកពុទ្ធិ(គ្មានរូប) គឺតម្រូវឳ្យយើងមានឆន្ទៈខ្ពស់ក្នុងការវិនិយោគនិងការប្តេជ្ញាចិត្តរួមគ្នាអនុវត្តដើម្បីទទួលបានលទ្ធផលស្របនឹងការរំពឹងទុក ។

      ទោះបីជា វ.ប.ន អាចត្រូវបានទទួលដោយមធ្យោបាយនិងប្រភពផ្សេងៗក្តីក៏ការស្រាវជ្រាវ និងការអភិវឌ្ឍនៅតែជាកិច្ចការគន្លឹះមិនអាចខ្វះបាននៅក្នុងការបង្កើតនិងការកសាងសមត្ថភាពចាប់យកបច្ចេកវិទ្យា ដោយតម្រូវការធ្វើមូលដ្ឋាននីយកម្ម បច្ចេកវិទ្យា ដើម្បីឆ្លើយតបនឹងសេចក្តីត្រូវការក្នុងស្រុក ក៏ដូចជាដើម្បីកសាងសមត្ថភាពប្រកួតប្រជែងជាសកលរបស់ផលិតផលនិងស្នាដៃជាតិ ។

 Apple បានប្រាប់យើងថា តើពិភពលោកនឹងទៅជាយ៉ាងម៉េច ? Apple គឺវាមិនគ្រាន់តែជាផលិតផលម៉ាស៊ីនទៀតទេ ប៉ុន្តែវាជាផលិតផលទិន្នន័យនៃអ្វីគ្រប់យ៉ាង ។

            ទាក់ទងនឹងបច្ចុប្បន្នកាល Jac Ma ជឿថាយើងកំពុងរស់ក្នុងសតវត្សរ៍ដ៏អស្ចារ្យបំផុត ។ បដិវត្តន៍បច្ចេកវិទ្យាទី១ គឺការផ្តោតសំខាន់លើកម្លាំងពលកម្មនៅក្នុងរោងចក្រ ដែលមានរយៈពេល ៥០ឆ្នាំ ហើយបដិវត្តន៍នេះបាននាំឳ្យមានសង្គ្រាមលោកលើកទី១ ។ បដិវត្តន៍បច្ចេកវិទ្យាលើកទី២ គឺបានផ្តោតទៅលើកម្លាំងថាមពល ឬអេឡិចត្រូនិចនៅក្នុងក្រុមហ៊ុន ដែលមានរយៈពេល ៥០ឆ្នាំ ហើយបដិវត្តន៍នេះ គឺបាននាំឳ្យមានសង្គ្រាមលោកលើកទី២ ។ បដិវត្តន៍បច្ចេកវិទ្យាលើកទី៣ គឺផ្តោតលើអុិនធឺណិតនៅគ្រប់ទីកន្លែងដែលមានរយៈពេល ៥០ឆ្នាំ ហើយបដិវត្តន៍នេះនាំឳ្យមានសង្គ្រាមលោកលើកទី៣ តែសង្គ្រាមនេះ មិនប្រយុទ្ធរវាងជាតិសាសន៍ទៀតទេ តែវាគឺជាសង្គ្រាមដែលយើងត្រូវការធ្វើកិច្ចការរួមគ្នាដើម្បីប្រយុទ្ធនឹងភាពក្រីក្រ ភាពមានជម្ងឺ និងការប្រែប្រួលអាកាសធាតុ ។ អនាគតរបស់យើង គឺត្រូវការរួមគ្នា ដើម្បីក្មេងជំនាន់ក្រោយ។ ពួកយើងមិនប្រើកាំភ្លើងទេ តែពួកយើងប្រើកុំព្យូទ័រប្រើទិន្នន័យ ដើម្បីដោះស្រាយបញ្ហារបស់មនុស្សនិងសង្គម។ ទាំងនេះ គឺជាអ្វីដែលជាមហិច្ឆតារបស់ Ma។  បច្ចុប្បន្នអុិនធឺណិត ទើបតែមានអាយុកាល ២០ឆ្នាំ ប៉ុណ្ណោះ ហើយវានៅ៣០ឆ្នាំទៀត ដែលជាពេលវេលាដ៏ល្អបំផុតសម្រាប់យុវជនយើង។ យុវជនដែលមានសំណាងបំផុត គឺយុវជនដែលមានអាយុ៣០-៤០ឆ្នាំ។ កាលពី២០ឆ្នាំមុន គឺជាយុគសម័យបច្ចេកវិទ្យាព័ត៌មាន ហៅកាត់ថា IT ហើយ IT បានជួយមនុស្សនិងក្រុមហ៊ុនឳ្យមានភាពរឹងមាំនិងខ្លាំងជាងមុន។ IT បានជួយឳ្យអ្នកទទួលបានព័ត៌មានតាមរយៈបច្ចេកវិទ្យា។ តែឥឡូវនេះយើងកំពុងរស់នៅក្នុងយុគសម័យបច្ចេកវិទ្យាទិន្នន័យ ដែលហៅកាត់ថា DT(Data Technology) ហើយ DT វាផ្ទុយពីសម័យ IT ។ នៅក្នុងសម័យ IT ខ្ញុំមាន អ្នកគ្មាន តែនៅក្នុងសម័យ DT ខ្ញុំមាន អ្នកមាន។ DTគឺជាប្រភពទិន្នន័យគ្រប់យ៉ាង ដែលលើសពីព័ត៌មានទៅទៀតហើយវាអាចចែករំលែកទៅមនុស្សគ្រប់គ្នាតាមរយៈបច្ចេកវិទ្យា។ ដូច្នេះ យើងបានមកដល់សម័យ DT ដែលមនុស្សគ្រប់គ្នាអាចទទួលបានអ្វីៗគ្រប់យ៉ាងនៅក្នុងបច្ចេកវិទ្យាហើយប្រសិនបើអ្នកចេះប្រើវា នោះវាគឺជាយុគសម័យរបស់អ្នក។ នៅក្នុងយុគសម័យ DT មនុស្សគ្រប់គ្នាគឺដូចគ្នា ពីព្រោះយើងចាប់ផ្តើមពីចំណុចដូចគ្នា និងគ្មានអ្នកជំនាញ DT ទេ ហើយអនាគតអ្នកជំនាញ IT នឹងជួបបញ្ហា។ យើងកំពុងរស់ក្នុងពិភពលោកដ៏អស្ចារ្យពិភពនៃការបង្កើតថ្មី ពិភពនៃការច្នៃប្រឌិត ពិភពនៃការជំរុញលើកទឹកចិត្ត ពោលគឺពិភពនៃក្តីសុបិន។ ដោយសារតែទិន្នន័យអ្វីៗគ្រប់យ៉ាងអាចក្លាយជាការពិត។ បច្ចេកវិទ្យា គឺមិនមែនជាអ្នកផ្លាស់ប្តូរពិភពលោកទេ តែសុបិន គឺជាអ្នកផ្លាស់ប្តូរពិភពលោក ។ បច្ចេកវិទ្យាអុិនធឺណិត មិនបំផ្លាញការងារទេ គឺមានតែបង្កើតការងារថ្មី។

 ចូរអ្នកធ្វើអ្វីដែលអ្នកចង់ធ្វើ ។ ធ្វើវានិងរៀនពីវា នោះអ្នកនឹងមានលទ្ធភាពសម្រេចបាននូវអ្វីដែលអ្នកប៉ងប្រាថ្នា ។ Omidyar

 មនុស្សដែលបញ្ចុះបញ្ចូលខ្លួនឯងថា ធ្វើមិនបាន គឺជាមនុស្សគ្រោះថ្នាក់ និងគួរឳ្យខ្លាចបំផុត ។ Omidyar

 អ្នកដែលគ្មានហេតុផល គឺជាមនុស្សភ្លីភ្លើ ។ អ្នកដែលគ្មានឆន្ទៈ គឺជាមនុស្សងងឹតងងល់ ។ អ្នកដែលគ្មានសេចក្តីក្លាហាន គឺជាទាសករ ។ Andrew Carnegie

 គុណភាពនៃជីវិតរបស់អ្នក គឺអាស្រ័យលើអ្វីដែលអ្នកធ្វើ និងអ្វីដែលអ្នកចង់ ។ Andrew Carnegie

 មនុស្សទាំងអស់មានមូលដ្ឋានជាមនុស្សល្អ និងស្មោះត្រង់ ។ ដូច្នេះ វាគួរតែត្រូវបានលើកទឹកចិត្តឳ្យចេះសហការគ្នា និងធ្វើអាជីវកម្មជាមួយគ្នា ។ eBay